Торайғыров университетінің қабырғасында педагог және білім беруді ұйымдастырушы Баки Мүбараковты еске алуға арналған "Ауыл мектебін жаңғырту: білім берудің қолжетімділігі мен сапасы" атты ғылыми конференция өтті.

Кездесуге қатысушыларды ЖОО ректоры Еркін Садықов құттықтау сөзбен қарсы алды.

- Қалалық және ауылдық мектептер арасында ешқандай айырмашылық болмауы керек. Дәл осы индикаторға бірінші кезекте Қазақстанның орта білім беру жүйесінде ұмтылу керек. Павлодар облысындағы осындай қозғалыстың негізін қалаушылардың бірі - ұзақ жылдар бойы Успен ауданындағы Қаратай жалпы білім беретін мектебін басқарған Баки Мүбараков. Педагогикалық таланты мен ұйымдастырушылық қабілетінің арқасында ол қарапайым ауыл мектебінен жоғары білімді балаларды  түлеткен табысты оқу орнын құрды. Ол мектептің қалалық білім беру ұйымдарынан еш кем түспеуі үшін көп жұмыс жасады, - деп атап өтті ЖОО ректоры Еркін Садықов.

Конференцияда Ж. Аймауытов атындағы этнопедагогика және білім берудің инновациялық технологиялары ҒПО директоры Е. Жұматаева баяндама жасады. Ол мектептердің имиджін арттыру үшін  жағдай қандай болуы керектігі туралы айтты.

Павлодар облысы білім басқармасының Білім беруді дамытудың инновациялық орталығы директорының әдістемелік және кадрлық жұмыс жөніндегі орынбасары Айтжамал Қожахметова қазір қаланың мамандандырылған мектептері мен ауылдық мектептердің өзара іс-қимылына бағытталған "қала-ауыл" өңірлік жобасы белсенді дамып келе жатқанын айтты. Бұл жоба аясында олимпиадалық қозғалыс қолдауға ие. Алғашқы нәтижелер де бар - ауыл мектептерінің оқушылары арасында жүлделі орындар көбейді.

Сондай-ақ, конференцияда жоғары оқу орны мен ауыл мектебінің өзара іс-қимылы білім беру тиімділігінің факторы ретінде атап өтілді. Мұнда кадрлық резерв деңгейін арттыру, мұғалімдердің кәсіби даму ерекшеліктері және т.б. талқыланды. Айта кетейік, ЖОО ауылдық мектептермен белсенді қарым-қатынаста — көшпелі қабылдау комиссиясы, ғылыми практика және зерттеу жұмыстары жүргізіледі.