Торайғыров университетінде Қазақстан Республикасының Президенті Қасым-Жомарт Тоқаевтың «Оқу мәдениетін дамыту және интеллектуалды ұлтты қалыптастыру шаралары туралы» Жарлығын іске асыруға, сондай-ақ «Кітап оқитын ұлт» ұлттық жобасын іске қосуға арналған кеңейтілген жұмыс кеңесі өтті.

Кездесудің басты тақырыбы ауқымды республикалық марафонның университетшіл бағыты — «Кітап оқитын университет» жобасын талқылау болды.

Талқылауға Басқарма мүшелері, құрылымдық бөлімшелердің басшылары, кафедра меңгерушілері мен университет еңбек сіңірген ғалымдары қатысты. Кеңеске қатысушылар жастар, сондай-ақ профессор-оқытушылар құрамы арасында оқу мәдениетін дамытудың стратегиялық маңыздылығын атап өтті.

«Біздің басты мақсатымыз — марафонға жай ғана қатысу емес, кітап тұлғалық әрі кәсіби өсудің негізгі құралына айналатын тұрақты интеллектуалды ортаны қалыптастыру. Кітап оқу бірінші курс студенттерінен бастап жетекші профессорлар мен ғалымдарға дейінгі бүкіл ұжымымыздың басын біріктіреді», — деп атап өтті Жастар саясаты және әкімшілік қызмет жөніндегі проректор Индира Оралқанова.

Марафон алты айға созылады. Осы уақыт ішінде қатысушылар әлемдік және отандық әдебиеттің бестселлерлерімен, тұлғалық даму, көшбасшылық, сондай-ақ бейіндік пәндер бойынша шығармалармен және еңбектермен танысады. Жоба аясында интеллектуалды квиздер мен конкурстар да жоспарланған. Белсенді қатысушылар мен жеңімпаздарды бағалы сыйлықтар күтеді.

Жақын арада Торайғыров университетінде факультеттік командалар құрылып, педагог-менторлар тағайындалады, ал кітапханада «Кітап оқитын ұлт» тақырыптық ақпараттық бұрышы безендіріледі. «Кітап оқитын университет» жобасы студенттер мен оқытушыларды оқу мәдениеті, білім алмасу және университетте интеллектуалды ортаны қалыптастыру төңірегінде біріктіретін маңызды алаңға айналмақ.