Қазақстан Республикасының Ұлттық Инженерлік академиясы "Жылдың үздік инженері" X Республикалық байқауын жариялайды. 
Байқау еліміздің үздік инженерлерінің жетістіктері мен тәжірибесін насихаттау және инженер мамандығын дәріптеу мақсатында өткізіледі.
Сайысқа қатысу шарттарымен және талаптарымен сайтта танысуға болады www.neark.kz

Конкурсқа қатысуға құжаттарды тапсыру мерзімі қатысушының сауалнамасына сәйкес 2025 жылғы 1 қазанға дейін.

1. Конкурсқа қатысушыларға қойылатын талаптар
Конкурсқа қатысуға жоғары инженерлік білімі және құзыреттілігінің жоғары деңгейі бар, жасына, лауазымына, ғылыми атағы мен дәрежесінің болуына қарамастан әртүрлі меншік нысанындағы кәсіпорындарда, ұйымдар мен мекемелерде инженерлік жұмыспен айналысатын және инженерлік әзірлемелердің елеулі нәтижелері бар адамдар жіберіледі.

Конкурсқа қатысуға кандидатураларды облыстық атқарушы органдар, ғылыми — техникалық қоғамдардың өңірлік қоғамдық ұйымдарының және басқа да қоғамдық бірлестіктердің басшылығы конкурс комиссиясына ұсынады.

Кандидатураны ұсыну кезінде кандидаттың келесі қасиеттерін ескеру қажет:

техникалық ойлаудың дербестігі және жаңа материалдарды, машиналарды, жабдықтарды, аспаптарды, технологияларды әзірлеуге дайындық, машиналарды, жабдықтар мен аспаптарды автоматтандырылған жобалау, құрастыру дағдыларын меңгеру;
аналитикалық қызметке, кәсіби қызмет мазмұнының өзгеруіне икемді бейімделуге бағытталған дайындықтың кешенділігі;
ғылыми талдау және синтез негізінде техникалық мәселелер бойынша өз пайымдауларын еркін жеткізе білу;
өндіріс тиімділігі мен еңбек өнімділігін арттыруды, өндірістік ресурстарды ұтымды пайдалануды, өнімнің, технологияның, жұмыстар мен қызметтердің жоғары сапасы мен бәсекеге қабілеттілігін қамтамасыз ету қабілеті;
шығармашылық бастаманы, рационализацияны, өнертабысты дамыту, отандық және шетелдік ғылымның, техниканың жетістіктерін енгізу, ұйымның тиімді жұмысын қамтамасыз ететін озық тәжірибені пайдалану;
өзінің кәсіби деңгейін көтеру бойынша жұмыс (үздіксіз білім беру және өзін-өзі тәрбиелеу).
2. Конкурсқа кандидатуралар мен материалдарды ұсыну тәртібі мен мерзімі
Конкурсты өткізу мерзімдері мен шарттары туралы ақпарат ҚР Ұлттық Инженерлік академияларының ресми сайтында орналастырылады және жыл сайын 12 сәуірде бұқаралық ақпарат құралдарында жарияланады.

Қатысу үшін конкурстық комиссияға келесі ілеспе материалдармен өтінім беру қажет:

отырыс хаттамасынан үзінді көшірмені қоса бере отырып, кандидатураны ұсыну (ұсыным);
инженерлік тәжірибе деңгейі туралы сараптамалық қорытындыны қамтитын кандидаттың кәсіби жетістіктері туралы мәліметтер;
қатысушының сауалнамасы (комиссия бекіткен нысан бойынша);
жоғары білім туралы дипломның көшірмесі;
кандидат баспасөзде жариялаған ғылыми жұмыстардың тізімі, өнертабыстардың, патенттердің және рационализаторлық ұсыныстардың тізбесі және т. б.
3×4 см түсті фотосурет (электронды түрде);
жетістіктерді немесе дамуды суреттейтін схемалар, графиктер, суреттер, фотосуреттер (қатысушылардың қалауы бойынша);
үміткердің жетістіктері туралы қысқаша ақпараты бар буклетте жариялауға арналған түйіндеме (20 жолға дейін).
Конкурсқа қатысу үшін материалдар жіберу:

Пошта арқылы: Қазақстан Республикасы, 050060, Алматы қ., Ходжанова, 67, 6 қабат, ҚР Ұлттық Инженерлік академиясы.
Электрондық пошта арқылы e-mail: nia_rk@mail.ru
Телефон: 8(727) 339-12-84
3.Жеңімпаздарды іріктеу және марапаттау рәсімі
Құжаттарды қарау осы Ережеде белгіленген талаптарға сәйкес жүргізіледі. Іріктеу рәсімі комиссияның конкурсанттарға сараптамалық бағалау жүргізуін қамтиды. Конкурсқа қатысушы көрсетілген талаптарға сәйкес келмеген немесе дұрыс емес ақпарат ұсынылған жағдайда конкурсқа қатысудан бас тартылуы мүмкін.

Конкурс нәтижелері комиссияның қорытынды отырысында жыл сайын IV тоқсанда шығарылады және жеңімпаздар тізімін қамтитын хаттамамен ресімделеді.

Байқау жеңімпаздары дипломдармен және "Жылдың үздік инженері" естелік медалімен марапатталады.
Конкурс қорытындылары ҚР ҰИА сайтында, "ҚР ҰИА Хабаршысы" журналында және Қазақстан Республикасының басқа да ақпараттық ресурстарында конкурс жеңімпаздарының есімдерімен және олардың жетістіктері туралы қысқаша ақпаратпен жарияланады.

Қазақстан Республикасының Мәдениет және ақпарат министрлігі «Дарын» мемлекеттік жастар сыйлығына байқау жариялайды.

«Дарын» мемлекеттік жастар сыйлығы -  ғылым, шығармашылық, қоғамдық қызмет салаларында жемiстi еңбегімен көзге түскен, сондай-ақ жоғары спорттық жетістіктері үшін дарынды жастарды мемлекет тарапынан қолдау мақсатында ұсынылады.

Байқау «Әдебиет», «Ғылым», «Дизайн және бейнелеу өнері», «Журналистика», «Классикалық музыка», «Креативті бастамалар», «Спорт», «Театр және кино», «Эстрада», «Халық шығармашылығы» атты 10 номинация бойынша өтеді.

Сыйлық алуға халықаралық және республикалық конкурстардың, фестивальдар мен түрлі шаралардың лауреаттары, республикалық және халықаралық деңгейлердегі спорттық жарыстардың жүлдегерлері мен жеңімпаздары, сондай-ақ қызметі инновациялық болып табылатын және тиісті сала мен тұтастай қоғамды дамытуға ықпал еткен Қазақстан Республикасының 35 жасқа дейінгі азаматтары үміткер бола алады.

«Дарын» жастар сыйлығын алуға кандидатураларды ұсынуды мемлекеттiк органдар, қоғамдық бiрлестiктердің өкілдері жүргiзедi.

Жеңімпаздарға «Дарын мемлекеттік жастар сыйлығының лауреаты» атағы беріледі және олар дипломмен, төсбелгілермен сондай-ақ қаржылай сыйлықпен марапатталады.

Жыл сайын сыйлықты ұсыну Қазақстан Республикасының Тәуелсіздік күнін мерекелеу аясында өткізіледі.

«Дарын» жастар сыйлығы 1992 жылы тағайындалған. Әр жылдары аталған сыйлықты түрлі саладағы 320-дан астам азамат иеленген болатын.

Конкурсқа қатысуға құжаттар 2023 жылғы 20 қарашаға дейін Қазақстан Республикасы Мәдениет және ақпарат министрлігінің Жастар және отбасы істері комитеті (қағаз нұсқада) мына мекенжай бойынша: Астана қаласы, Мәнгілік ел даңғылы 10, «Министрліктер үйі» ғимаратында (14-кіреберіс) қабылданады. Ал электрондық нұсқаны premiya.daryn@gmail.com поштасына жолдауға болады. Байланыс номерлері: 8(7172) 74-05-25, 8(7172) 74-18-43, 8 701 170 46 54.

«Ұлттық зияткерлік меншік институты» РМК және Қазақстан Республикасы Әділет министрлігі өнертапқыштық саласындағы жетістіктерге арналған Республикалық «Шапағат» байқауының басталғанын хабарлайды (бұдан әрі – «Шапағат» байқауы).

Байқаудың мақсаты – қазақстандық ғалымдардың өнертапқыштық қызметін және отандық кәсіпорындардың озық жетістіктерін қолдау және ынталандыру.

Байқау келесі номинациялар бойынша өткізіледі: «Жыл өнертабысы», «Өнертапқыш әйел», «Ең белсенді өнертапқыш», «Үздік инновациялық компания», «Жас өнертапқыш» (18–35 жас аралығындағы жас ғалымдар мен студенттерге арналған), «Жас дарын» (10–18 жас аралығындағы оқушыларға арналған).

«Жыл өнертабысы», «Өнертапқыш әйел» және «Жас өнертапқыш» номинацияларына тек 2024 жылы Қазақстан Республикасы тарапынан берілген жарамды өнертабыс патенттерінің иелері қатыса алады.

«Шапағат» байқауы аясында «Қазақстан Республикасының еңбек сіңірген өнертапқышы» құрметті атағын беру көзделген.

Аталған құрметті атақты беруге қатысты ұсынысты мемлекеттік органдар, ғылыми ұйымдар, қоғамдық бірлестіктер, өнертабыс (өнертабыстарды) өндіріске енгізген кәсіпорындар, мекемелер немесе ұйымдар бастама ете алады.

Комиссия мүшелері  «Қазақстан Республикасының еңбек сіңірген өнертапқышы» атағын келесі критерийлерге сүйене отырып береді:

- алынған және қолданылып жүрген өнертабыс патенттері мен авторлық куәліктердің жалпы саны;

- әртүрлі экономика салаларында кеңінен қолданылып жатқан маңызды өнертабыстарды енгізудің нәтижелері. Бұл өнертабыстардың жалпы экономикалық тиімділігі және әлеуметтік маңыздылығы (өнертабысты енгізу туралы актілер, ғылыми немесе ғылыми-техникалық қызметпен айналысатын тұлғалар мен ұйымдардың пікірлері);

- өнертапқыштық қызметпен айналысқан жалпы жұмыс өтілі;

- өнертабысты пайдалануға беру және (немесе) оны пайдалануға құқықты табыстау тіркелімдерінің саны.

Байқау жеңімпаздарын анықтауды мемлекеттік органдардың, ғылыми ұйымдардың, бизнес қауымдастықтың, инновациялық даму институттарының және қоғамдық ұйымдардың өкілдерінен тұратын Байқау комиссиясы жүзеге асырады.

Бағалау келесі критерийлер бойынша жүргізіледі: әлеуметтік маңыздылық, экономикалық тиімділік, экологиялық қауіпсіздік, бәсекеге қабілеттілік, өндірісте және коммерцияландыруда табысты қолдану.

Байқау жеңімпаздары дипломдармен, арнайы статуэткалармен және 500 мыңнан 1 миллион теңгеге дейінгі ақшалай сертификаттармен марапатталады.

«Шапағат» байқауына қатысу және «Қазақстан Республикасының еңбек сіңірген өнертапқышы» атағын беру үшін өтінімдер мен ұсынымдар 2025 жылғы 9 маусым мен 15 қазан аралығында shapagat@kazpatent.kz электронды поштасына қабылданады.