Торайғыров университетінде қазақ киносының негізін қалаушы Шәкен Аймановтың 110 жылдығына арналған халықаралық ғылыми-практикалық конференция өтті.

Павлодар облысының әкімі Асайын Байханов құттықтау сөз сөйледі.

- Шәкен Айманов - ұлттық кино әлемінің символы. «Алдар көсе», «Атамекен», «Тақиялы періште», «Біздің сүйікті дәрігер» сияқты фильмдері бірнеше буын ұрпақты тәрбиеледі және бүгінгі күнге дейін нағыз өнердің үлгісі болып табылады.

Әр халықтың мемлекет мәдениеті мен тарихында ерекше із қалдырған өзіндік тұлғалары бар. Біз үшін - бұл Шәкен Айманов.

Пленарлық отырыста Қазақстанның еңбек сіңірген қайраткері, кинорежиссер, Қазақ ұлттық өнер университетінің профессоры Сламбек Тәуекел, қазақ театр және кино актері Ергенбай Әбу, сондай-ақ университет ғалымдары құрметті қонақтар ретінде сөз сөйледі.

Конференция аясында Шәкен Аймановтың өмірі мен шығармашылығына арналған "Сұңғыла" кітабының тұсаукесері өтті. Кітапқа Олжас Сүлейменов, Әбіш Кекілбаев, Асанәлі Әшімов, Бибігүл Төлегенова, Әкім Тарази, Әшірбек Сығаев және Шәкен Аймановпен иық тіресіп жұмыс істеген басқа да өнер қайраткерлерінің естелік мақалалары енген.

Сондай-ақ, Шәкен Айманов туралы деректі фильм көрсетілді, онда кинорежиссердің әріптестері мен ізбасарлары өз естеліктерімен бөлісті.

 - Шәкен Айманов өзінің талантын тек кинода ғана емес, театр өнерінде де көрсеткен нағыз талант иесі болды. Университетте "Актерлік өнер" білім беру бағдарламасы бар, онда болашақта кинода өзін көрсете алатын театр мамандарын дайындайды. Торайғыров университетінде барлық ниет білдірген студенттер үшін ашық театр студиясы жұмыс істейді, - деп атап өтті ЖОО ректоры Еркін Садықов.

Шәкен Айманов - қазақ өнеріндегі көрнекті тұлға, талантты актер және режиссер. Ол қазақ киносының классиктерінің бірі болып танылды, оның шығармашылық жетістіктері ұлттық кино тарихында өшпес із қалдырды.