Торайғыров университеті  сыбайлас жемқорлыққа қарсы іс-қимыл менеджменті жүйесінің ISO 37001:2016 халықаралық стандартын енгізген Павлодар облысындағы алғашқы ұйым және еліміздегі екінші жоғары оқу орны болды. Университет Cert International (Словакия) аккредиттеуден өтті.

Бүгін ЖОО-да сертификатты табыстаудың ресми рәсімі өтті, оған Қазақстандағы CERT International басшысы Константин Павлов, Қазақстан Республикасы Сыбайлас жемқорлыққа қарсы іс-қимыл агенттігінің Павлодар облысы бойынша департаментінің басшысы Дархан Құрақбаев, Қазақстандық білім және ғылым қызметкерлерінің салалық кәсіподағының Павлодар облыстық ұйымының төрағасы Гүлбарам Науразбаева, "Әділдік жолы" республикалық қоғамдық бірлестігі филиалының басшысы Нұргүл Қайырденова, "Қазақстан HR Қауымдастығы" филиалының басшысы Людмила Пак қатысты.

Бұл үдерісте сыртқы кеңесші және сарапшы ретінде ҚР Президенті жанындағы Мемлекеттік басқару академиясының Павлодар облыстық филиалының директоры 
Гүлнара Исенова сөз сөйледі. 

-Мен үшін және біздің ЖОО-ның барлық ұжымы үшін бұл құжатты алу бүгін үлкен жеңіс болды. Сертификаттауға дайындық процесі алты айға жуық уақытты алды. Осы уақыт ішінде университет ішінде бизнес-процестер қайта құрылып, жаңа құжаттар мен ережелер әзірленіп, енгізілді. Сонымен қатар, ToU қызметкерлерінің бір бөлігі сыбайлас жемқорлыққа қарсы іс-қимыл бойынша менеджмент жүйесін зерделеу курсынан өтті. Халықаралық стандартқа сәйкестікті растау үшін көп күш жұмсауға тура келді. Оны енгізу бізге сыбайлас жемқорлық әрекеттерін анықтауға және алдын алуға мүмкіндік береді, - деп атап өтті ЖОО ректоры Еркін Садықов.

Айта кетейік, 2022 жылғы ақпанда Қазақстан Республикасы Президентінің Жарлығымен Қазақстан Республикасының 2022-2026 жылдарға арналған сыбайлас жемқорлыққа қарсы саясатының тұжырымдамасы бекітілді, онда ISO 37001:2016 парақорлыққа қарсы күрес менеджменті жүйесінің халықаралық стандарты негізгі көрсеткіштердің бірі болып табылады.