Бірнеше жылдан кейін IT маманы қандай болуы керек және оны даярлау үшін бүгін қандай қадамдар жасау қажет? Бұл мәселелер Торайғыров университетінде ректор Нұрлан Медетовтің IT индустриясы, өндіріс, колледж және Павлодар облысының әкімдігі өкілдерімен кездесуінде талқыланды.

Кездесу барысында алдымен Tomorrow School алаңы таныстырылды. Кейін Торайғыров университетінің цифрлық офицері Аида Жиенбаева университетте әзірленген жасанды интеллект агенттерін таныстырды. Қатысушылар заманауи цифрлық шешімдердің іс жүзінде қалай қолданылатынын және олардың студенттік жобаларға қалай негіз бола алатынын көрді.

Негізгі назар IT бағыттары бойынша білім алушылардың қандай құзыреттерді меңгеруі қажет екеніне аударылды. Жұмыс берушілер мен университет өкілдері еңбек нарығында сұранысқа ие дағдыларды, білім беру бағдарламаларын жаңартуды және бизнес өкілдерінің оқу үдерісіне белсенді қатысуын талқылады.

Бұл ретте теориямен шектелмей, нақты тәжірибеге басымдық беру мәселесі көтерілді. Атап айтқанда, білім алушыларды нақты өндірістік міндеттерге тарту, дуальды оқыту, тағылымдамадан өту, компания мамандарының тәлімгерлігі және дипломдық жобаларды бірлесіп әзірлеу ұсынылды.

Кездесуде университет, IT компаниялары мен мемлекеттік органдардың мүмкіндіктерін біріктіру жолдары да қарастырылды. Солардың бірі – студенттерге өңірдің нақты цифрлық міндеттерін ұсынып, оларды оқу және пилоттық жобалар аясында шешуге мүмкіндік беру. Бұл ретте деректермен жұмыс істеу және киберқауіпсіздік талаптарына ерекше мән берілмек.

Тағы бір маңызды бағыт – «мектеп – колледж – университет – жұмыс беруші» қағидаты бойынша маман даярлаудың үздіксіз траекториясын қалыптастыру. Қатысушылардың пікірінше, мұндай тәсіл болашағы зор жастарды ерте анықтап, олардың практикалық дағдыларын дамытуға және талантты жастардың өз өңірінде кәсіби жолын жалғастыруына мүмкіндік береді.

Кездесу қорытындысы бойынша тараптар бірлескен жұмыстың негізгі бағыттарын айқындады. Келесі қадам – нақты міндеттерді, жауапты тұлғалар мен мерзімдерді қамтитын бірлескен жобалардың жол картасын әзірлеу.

Павлодар облысы үшін бұл – тек білікті мамандар даярлау мәселесі емес. Бұл білім беру, бизнес пен мемлекеттік құрылымдар өзара ықпалдасып, студенттердің оқу кезінде-ақ өңірдің нақты міндеттерін шешуге мүмкіндік беретін цифрлық экожүйені қалыптастырудың маңызды қадамы.