Торайғыров университетінде «Трасология» криминалистикалық полигонының салтанатты ашылуы өтті. Жаңа оқу алаңы студенттерді практикаға бағытталған даярлауға арналған және болашақ мамандарға кәсіби ортаға барынша жақын жағдайда криминалистикалық жұмыс дағдыларын меңгеруге мүмкіндік береді.

Іс-шараға университет басшылығы, оқытушылар мен студенттер, сондай-ақ Павлодар облысының Полиция департаментінің өкілдері және криминалистика саласының практик мамандары қатысты.

Полигонның негізгі бағыты – іздерді зерттеуге байланысты криминалистика саласы – трасология. Ашылу барысында мамандар студенттерге аяқ киім іздерін анықтау, тіркеу, өлшеу және алу тәртібін көрсетті. Қатысушылар масштабтық сызғышты пайдалана отырып, іздерді фототіркеу және қозғалыс бағытын анықтау тәсілдерімен де танысты.

Практикалық көрсетілімнің тағы бір бөлігі көлік құралдарының іздерін зерттеуге арналды. Полиция қызметкерлері қозғалыс бағытын анықтау, іздің ұзындығы мен енін өлшеу, протектор ерекшеліктерін тіркеу және іздердің орналасу сызбасын жасау әдістерін көрсетті. Практикалық бөлім студенттерге криминалистің әрекет ету ретін және заттай іздермен жұмыс істеу ерекшеліктерін оқу полигонында тікелей көруге мүмкіндік берді.

Шеберлік сабақтарынан кейін Полиция департаментінің өкілдері студенттерге көрнекі материалдарды ұсынып, кәсіби қызметтің ерекшеліктері туралы айтып берді. Павлодар облысы Полиция департаменті бастығының орынбасары, полиция полковнигі Сафуан Жампейсов студенттер алдында сөз сөйлеп, тергеу қызметі, мансаптық мүмкіндіктер және полиция органдарына жұмысқа орналасу тәртібі туралы ақпарат берді.

«Трасология» криминалистикалық полигоны практикалық сабақтар, шеберлік сабақтары, оқу эксперименттері мен ғылыми-зерттеу жұмыстарын өткізу үшін пайдаланылады. Сондай-ақ оқу алаңы Торайғыров университеті мен Павлодар облысының құқық қорғау органдары арасындағы өзара ынтымақтастықты одан әрі дамытуға негіз болады.