Конституция күні қарсаңында Торайғыров университетінде «Мәңгілік жаса, қыран елім!» атты салтанатты іс-шара өтті.

Мерекелік жиын ортаға мемлекеттік рәміздерді ұлықтаудан басталды. Шара барысында қатысушыларға соңғы 30 жылдағы конституциялық реформалардың негізгі кезеңдері туралы ақпарат ұсынылды. Экономика және құқық факультетінің деканы Юрий Колесников өз сөзінде, бүгінгі таңда жалпыға бірдей адами құқықтарға негізделген ел Конституциясы, қазақстандықтардың құқықтары мен бостандықтарын барынша қорғайтынын атап өтті.

Торайғыров университетінің ректоры Нұрлан Медетов қоғам санасын қалыптастыру мен отансүйгіш жас кадрларды даярлаудағы университеттің рөліне ерекше мән берді. Басқарма төрағасы ғылыми жобаларын жүзеге асыру үшін гранттық қаржыландыруға ие болған, диссертацияларын сәтті қорғаған және профессор, қауымдастырылған профессор ғылыми атақтарына ие болған ғалымдарды құттықтады.

- ⁠Қасым-Жомарт Тоқаев айтқандай, біздің қоғамда әрқашан заң мен тәртіп үстем болуы тиіс, – деді Нұрлан Медетов. – Осы ұстанымды біз өмірімізде де, қызметімізде де басшылыққа алуымыз қажет. Сонда ғана еліміздің одан әрі дамуына жол ашамыз.

Конституция күніне орай ToU-дың 35 қызметкері түрлі марапаттарға ие болды. Олардың қатарында ҚР Ғылым және жоғары білім министрлігінің, Павлодар облысы әкімдігінің және Торайғыров университеті атынан арнайы төсбелгілері, Құрмет грамоталары мен Алғыс хаттары болды. Мереке университеттің студенттік филармониясы ұйымдастырған концертпен жалғасын тапты.