2025 жылғы 1 қыркүйектен 2026 жылғы 30 мамырға дейін Торайғыров университетінде C5+O.N.E. Program халықаралық білім беру жобасы жүзеге асырылуда. Жоба American Councils for International Education ұйымымен әріптестік аясында, АҚШ-тың Қазақстан Республикасындағы Миссиясының уақытша сенімді өкілі ханым Дебора Робинсонның, АҚШ-тың Қазақстандағы Елшілігінің қоғаммен байланыс жөніндегі маманы мырза Тимоти Гибсонның, сондай-ақ мырза Максат Қошқарбаевтың, C5+O.N.E. Program аға бағдарламалық офицерінің қолдауымен іске асырылып отыр.

Торайғыров университеті АҚШ пен Қазақстан жоғары оқу орындары арасындағы серіктестік жобаларына табысты қатысу тәжірибесіне ие. Бұған дейін университет Американдық халықаралық білім беру кеңесінің қолдауымен бірнеше бірлескен жобаларды сәтті аяқтап, академиялық ынтымақтастықты дамытуға, оқытушылардың біліктілігін арттыруға және білім беру үдерісіне озық тәжірибелерді енгізуге бағытталған жұмыстарды жүзеге асырған болатын.

Торайғыров университеті атынан бағдарламаға «Шетел филологиясы» кафедрасының профессоры Қайырбаева А.К. және аға оқытушы, магистр Байтемирова М.Ж. қатысуда. Ағымдағы жылдың жаз айларында олар оқытушыларға арналған ұлттық тренингке (National Training for Teachers) қатысып, енді университеттің профессор-оқытушылар құрамына, әкімшілік қызметкерлеріне, сондай-ақ Павлодар өңірінің бизнес-қоғамдастығы өкілдеріне арналған оқыту іс-шараларын өткізуге дайын.

Бағдарлама 180 академиялық сағаттан тұратын оқу курсын қамтиды. Курсты сәтті аяқтаған және барлық кезеңдерінен өткен қатысушыларға тиісті сертификат табысталатын болады. Университеттің 50-ден астам қызметкері оқуға қызығушылық танытып, тіркеліп және ағылшын тілін меңгеру деңгейін анықтауға арналған тестілеуден өтті.

Жоба АҚШ Мемлекеттік департаментімен қаржыландырылады және Қазақстан Республикасындағы АҚШ Елшілігінің қолдауымен American Councils for International Education ұйымы арқылы жүзеге асырылады.

C5+O.N.E. Program экономика, бизнес және кәсіпкерлік саласының мамандарына бағытталған. Бағдарлама ағылшын тілін қарқынды оқытуды, сондай-ақ америкалық мәдениетпен танысуды көздейді.

Аталған бастаманың Торайғыров университеті базасында іске асырылуы қызметкерлердің кәсіби және коммуникативтік құзыреттерін дамытуға, мәдениетаралық ынтымақтастықты нығайтуға және академиялық әрі кәсіби өсудің жаңа мүмкіндіктерін кеңейтуге ықпал етеді.