Торайғыров университеті бірінші курс студенттеріне арнайы экскурсия ұйымдастырды.

Жаңа оқу жылының қарсаңында «бірінші курс студенттерінің апталығы» басталды. Бұл жаңа студенттерге университеттің академиялық және қоғамдық өміріне сәтті бейімделуге көмектесу үшін өткізілетін дәстүрлі іс-шара.

«Бағдарлану аптасының мақсаты – университетпен, факультеттермен, эдвайзерлермен, оқу жүйесі, кітапхана, кампус пен студенттік өмірдің барлық қырларымен жақынырақ танысу. Студенттерді әр күн сайын пайдалы кездесулер, таныстыру шаралары, маңызды ақпарат күтеді: кредиттік оқыту технологиясы, ішкі тәртіп ережелері, әскери кафедра мен академиялық ұтқырлық мүмкіндіктері, жатақхана мен кампустық өмір, ғылыми-зерттеу жұмыстарына қатысу жолдары айтылатын болады», – деп атап өтті Торайғыров университетінің академиялық сұрақтар бойынша проректоры Ренат Нұрғожин.

Кездесудің алғашқы күніне шамамен 800 студент қатысты. Оларға Торайғыров университетіндегі оқу барысында қолжетімді мүмкіндіктер туралы Жастар ісі жөніндегі комитет, Халықаралық бөлім, Әскери кафедра және IT-хаб өкілдері айтып берді. Алдағы күндері студенттер факультеттерде өтетін кездесулерге қатысады.