Торайғыров университетінің Металлургия кафедрасы ғалымдарының делегациясы  Түркия, Швеция, Словакия, Ұлыбритания, Қазақстан және Өзбекстан жоғары оқу орындарының ғалымдарының қатысуымен Mugla Sıtkı Kosman University-де өткен Еуропалық Одақтың ERA-MIN 3 "Zero Waste Valorisation of Feldspathic Ores: Green and Sustainable Resource Use for Strategic Raw Materials – VALORE 2025" жобасы аясында халықаралық форумға қатысты.

Форумда "Металлургия" кафедрасының меңгерушісі Абылай Жүнісов, профессор Петр Быков, қауымдастырылған профессор Алтынсары Бәкіров және докторант Хамит Теміртас "Қазақстандағы алюминий өндірісінің қазіргі жағдайы және қалдықтарды қайта өңдеу бойынша зерттеулер" тақырыбындағы өз зерттеулерінің нәтижелерін таныстырды.

Торайғыров университетінің  Металлургия кафедрасының ғалымдары соңғы жылдары алюминий тотығы мен жылу электр станцияларының күл-қож қалдықтарын өнеркәсіптік өндіріске ең аз көміртегі ізімен тартудың тиімді нұсқаларын іздеу бойынша эксперименттік зерттеулер жүргізуде.

Бұл зерттеулерді "Сұранысқа ие өнеркәсіптік өнімді ала отырып, алюминий өндірісінің күлін және қалдықтарын қайта өңдеудің қалдықсыз кешенді технологиясын әзірлеу" (ғылыми жетекшісі  PhD А. Г. Бакиров), "Кондициялық емес күлді және алюминий шлактарын пайдалана отырып, құрамында алюминийі жоғары ферросилицийді балқыту технологиясын әзірлеу және зерттеу" (ғылыми жетекшісі т.ғ.к., профессор Жүнісов А.К.),   "Төмен көміртекті даму стратегиясын іске асыру кезінде баламалы тотықсыздандырғыштармен темірді толық өндірумен Қазақстан бокситтерін кешенді қайта өңдеу" (ғылыми жетекшісі т.ғ.к., профессор П. О. Быков) жобалары шеңберінде ҒЖБМ Ғылым комитеті қаржыландырады.

Айта кету керек, металлургия мен энергетиканың өнеркәсіптік қалдықтарын қайта өңдеу бағыты бойынша одан әрі бірлескен зерттеулерді дамыту, Mugla Sıtkı Kosman University, Firat University (Түркия), Lulea University of Technology (Швеция), Institute of Geotechnics SAS (Словакия), Еlement six Inc. (Ұлыбритания) ЖОО-мен көміртегі бейтараптығына қол жеткізуге жәрдемдесу туралы уағдаластықтарға қол жеткізілді.